SámiSoster-searvái geigejuvvui 11.10.2017 virggálaččat Eurohpalaš álbmotláhttu -bálkkášupmi Brysselis stuorra ávvudoaluid oktavuođas. Bálkkášumi leaba viežžamin SámiSoster searvvi sagadoalli Pekka Aikio ja doaimmajođiheaddji Ristenrauna Magga.
Stuorra ávvumállásiid maŋŋá Magga lea measta njuorrasan.
-Liggii váimmu gullat man dehálaš barggu min searvi bargá, das lea stuorra mearkkašupmi olles searvái. Bálkkášumi eai atte geasa beare, baicce dan vihkehallet hui dárkilit gii bálkkášumi oažžu, dan deattuhedje ávvumállásiin, muitala Magga.
Bálkkášupmi addá olles searvái ja bargiide movtta bargat ain eanet sámiid ovdii, illuda Magga.
-Bálkkášupmi addá nu olu fámuid boahttevuhtii. Dát movttidahttá smiehttagoahtit mo mii sáhttit vel eanet bargat sámiid ovdii ja oažžut eanet doaimmaid johtui.
Sirpa Pietikäinen: SámiSoster bargá dehálaš barggu sámiid buresveadjima ovdii.
SámiSoster searvái bálkkašumi lea evttohan europarlamentarihkkár Sirpa Pietikäinen (olgešbellodat). Son čálii twitteras ávvudoaluid áigge man dehálaš barggu SámiSoster bargá sámiid buresveadjima ovdii.
SámiSoster-searvái juolluduvvui geassemánus Eurohpalaš álbmotlahtu -bálkkašupmi (suomagillii “Euroopan kansalaisen palkinto”), muhto dál ordnejedje virggálaš ávvudoaluid Brysselis. Eurohpalaš álbmotláhtu bálkkašumi mieđihit sidjiide, geat leat joksan earenomáš mearkkašahtti olahusaid.
Bálkkašumi ákkat leat doaimmat, main ovddidit ovttasbarggu riikarájáid rastá ja ovdamearkka dihte riikkaidgaskasaš kulturovttasbarggu mii fas nanne Eurohpa-vuoiŋŋa.
Bálkkašumi ožžo olles Eurohpa uniovnnas 50 olbmo, searvvi dahje joavkku. Suomas áidna bálkkašumi oažžu lei SámiSoster searvi.
Eaba dušše ávvut Brysselis, baicce ovddideaba seammás sámiid rivttiid
SámiSostera njunnožat áiguba bargat Bryssela mátkki oktavuođas sámiid buorrin. Prográmmas leat máŋggat alladási deaivvadeamit dego ovdamearkka dihte deaivvadeapmi Eurohpa riekteáššealbmáin.
Sagadoalli Pekka Aikio ja doaimmajođiheaddji Ristenrauna Magga galgaba deaivat maiddái Eurohpa komišuvnna várresagadoalli Jyrki Katainen. Suinna Aikio ja Magga sagastallaba sámiid sajádagas Eurohpa uniovnna politihkkás.
-Dálhan dilli lea nu, ahte europarlamentarihkkát eai dieđe mo guđege mearrádus váikkuha sámiide, eaige sámit dieđe makkár mearrádusaid EU:s goasge dahket. Dan dieđu galggašii oažžut johtit lunddolaččat ja njuovžilit goappáge guvlui.
-Dat bođii ovdan maiddái ávvumállásiin, europarlamentarihkkárat ja virgeolbmot eai gávnna álkket dieđuid mearrádusaid váikkuhusain sápmelaččaide, diekko livčče divustan veara, dadjá Magga.
-Sagastallamis bohte váldit maiddái ovdan dan, gosa sámiid áššit eu-politihkkás gullet ja mo sámiid sajádaga eu-politihkkás nanne. Magga mielas sámiid áššit galggašedje gullat EU sispolitihkkái. Leathan sámit eamiálbmot, eai veahádat. Diet orru leamen oba váttis ášši man ovddidit, dat bođii jo ovdan beavdeságastallamiin ávvumállásiid oktavuođas, dadjá Magga.
