Sámiid girkobeivviid nubbi beaivi lea álgimen, ja olbmot leat doapmamin fas girkostallat. Lávvardaga fallun lea ipmilbálvalus davvisámegillii man jođihit suomabeale báhppat.
-Vahku jo leat vánddardan eatge vel girkku leat oaidnán, leaikkastallá Aslak-Juhan Juuso Gárasavvonis. Álggahanmeassu ja lávvardaga ipmilbálvalus leat girkobeivviid stuorra lávus.
Prošeaktabargi Jenni Tapionlinna lea vuolgán SámiSostera mátkái ja doaibmá mis eaktodáhtolaš veahkkin. Suinne lea boahtán buorre dovdu girkobeivviin.
-Somámus lei čuovvut mo buohkat ráhkkanedje ja čiŋadedje bearjadaga rahpanipmilbalvalussii, muitala Jenni.
Nu olu prográmma ahte juohke dáhpáhussii ii beasa
Biritta-Rauna Ketola rámida man somá girkobeivviin lea. Fuobmá son gal ovtta mii ii leat vuogas ja buohkat leat suinna ovttaoaivilis.
-Prográmma lea olu ja muhtun dáhpáhusat leat oktanaga eatge mii beasa oassálastit juohke dáhpáhussii. Ovdamearkka dihte ortodoksalaš rihppaipmilbálvalus lei dakkár áigái, ahte mii eat beassan dohko vaikko lei miella.
Eai oba váibbage vaikko olles beaivvi leat doapman dáhpáhusas nubbái
Biret-Anne Ruotsala Njunnásis ja Anni Äärelä Riebanjogas leaba gal duđavačča.
-Ean moai gal leat váiban, dadjá Ánne, Moai dat gal ean váibba, lohpida Biret-Anne.
-Sálbmalávlun lei gal oba buorre. Eai dat gal leat šat dat boares nuohttat. Oahpes sálmmat dat goit ledje. Sálmmaid lávluimmet goit lulli-, julev ja davvisámegillii.
-Oba máŋgga sámegillii mii ikte lávlluimet, in oba dieđege galli gillii, muittaša Aslak-Johan.
Buohkaide dáiddii leat oahpis goit sálbma, man maŋimužžan lávlluimet, nummir 77, o jurddaš go leat čoagganan. Sámi girkobeaivvit Ruoŧa Árvviesjávrries joatkašuvvet gitta sotnabeaivái.
