SámiSoster lea ordnen mátkki sámiid girkobeivviide Ruoŧa Árvviesjávrriei. Mátkái vulge gaskavahkku measta 50 olbmo miehtá sámi. Oassálastit leat nu Njuorggámis, Gárasavvonis go vaikkoba Vuohčusge.
Vuohčus busse fárrui njuiken Tuula-Maija Magga-Hetta lea hárjánan johttit sámiid girkobeivviin
-Lean fitnan Johkamohkis ja Anára girkobeivviin. Mo i Ranai in dalle beassan go dat ordnejuvvojedje borgemánus, dat lei heittot áigi barggu dihte. Jus fal dearvvasin ealán, de sihkkarit oassálasttán čuovvovaš girkobeivviidege, dáhkida Magga-Hetta.
“Girkobeivviin juohkehažžii juoidá”
Tuula-Maija maiddái muittuha, ahte girkobeivviin ii leat sáhka dušše searvegodde-eallimis, baicce olu viidát dáhpáhusas.
-Olbmuin lea boasttolágan govva girkobeivviin, doppe lea olu earáge go girkostallan. Doppe lea nu olu kultuvra fállun, konsearttat, filmmat ja vaikko mat, čilge son.
Vuosttas idjadeapmi mátkkis lea Durdnosis. Heahttás ja Anáris bohte olbmot guvttiin sierra sáhtuin ja go deaivvadedje eahketmállásiin, de ságat eai oba nohkange.
-Lea nu somá deaivat olbmuid, oahppásiid ja oahpásmuvvat ođđa olbmuide, dadjaba ovtta jitnii, Tuula-Maija ja Maarit-Inga Lörstrand, guhte ássá Geatkesavvonis Ruoŧa bealde. Son goit diehtá makkár dáhpáhusaide áigu oassálastit.
-Mun liikon go olbmot lávlot sámegillii. Ja visot girkostallamiin lea somá fitnat. In leat áibbas vissis veajángo eahketkonsearttaide, muitala Maarit-Inga.
Mátkki ii oro su mielas guhki gal, ii eisige:
-Ii leat mihkkige diet gaska go ii dárbbaš herggiin vuodjit, loahpaha son moju njálmmiin.
SámiSostera mátkki girkobeivviide sáhttát čuovvut ovdamearkka dihte instagramis dahje facebookkas. Go doppe ozat min konttu @samisoster de oainnát govaid min somás mátkkis.
