SámiSoster rs ja Maaseudun Terveys- ja Lomahuolto ry ordneba ovttas bearašluomu čuoiganguovddáš Ukkohallas, Hyrynsalmis 4.-9.3.2018. Bearašluopmu lea oaivvilduvvon bearrašiidda, mas guktot dahje nubbi vánhen lea sápmelaš.
Luomus mielde leamašan Maiju Saijets Vuohčus rámiida luomu.
-Leimmet olles bearaš Ukkohallas bearašluomus. Prográmmas lei ovdamearkka dihte oktasaš váláštallan olles bearrašii dego čuoigan- ja skirvehallanskuvla. Vánhemiidda lei ordnejuvvon maiddái logaldallan borramis ja lihkadeamis. Das, ahte mo lea dearvvaslaš boradit ja man ollu dárbbaša lihkadit.
Máŋggabealat prográmma, mas vuhtii váldojuvvo olles bearaš
Luopmu sisttisdoallá dievas bajásdoallama, idjademiid, luopmobáikki vuojadan- ja álšasále geavaheami ja joavkku várás plánejuvvon prográmma.
Saijets muitala, ahte sin bearaš liikui eanemus skirvehallamis.
-Suohttasamos leairras lei justa dat, ahte beasai ovttas bearrašiin geahččalit skirvehallama ja fitnat čuoiganskuvllas go das oahpai rivttes teknihka. Somá leai dieđusge maid čohkkedit álot guktii beaivái gárvves borramušbeavdái, iige dárbbašan ieš málestit.
Ávžžuha earáidge ohcat lupmui ja rávve skovi deavdimis
Saijets lohká, ahte jus ii livčče diibmá leamaš luomus, de ozašii vuot dánge jagi.
-Gánniha dieđusge ohcat lupmui dasgo das lea jurddašuvvon oppa bearaš, mánáide lea prográmma ja ollesolbmuide maiddái, rámiida Saijets.
Ohcanskoviid deavdin ii leat váttis. Saijets addá moadde buori rávvaga skovi deavdimii.
-Ohcamuša deavdimis gánniha muitit buktit ovdan bearraša earenoamáš dárbbu bearašlupmui. Ovdamearkka dihte badjebearrašis leat barggut nu čadnon sesoŋŋii, ahte ovttas lupmui beassan sáhttá leat measta veadjemeahttun. Dát sáhttá leat áidna vejolašvuohta olles bearrašii beassat oktanaga lupmui, dadjá Saijets.
Ohcanáigi lupmui nohká 4.12.2017. Ohcamušaid galgá sáddet addressii: Maaseudun Terveys- ja Lomahuolto ry, Mannerheimintie 31 B 20, 00250 HELSINKI
Luomu ohcanskovit ja rávvagat gávdnojit Maaseudun Terveys- ja Lomahuolto ry neahttasiidduin. Skoviid oažžu maiddái SámiSostera Anára ja Heahtá doaimmahagain.
Lassidieđuid luomus addá Anne Näkkäläjärvi, anne.nakkalajarvi@samisoster.fi, +358403504007 ja Inger-Anne Äärelä; inger-anne.aarela@samisoster.fi +358 40 760 9338.